Dhunë, fyerje, masakër! Me këto tre fjalë mund të përshkruajmë historinë që u ka ndodhur shqiptarëve të vënë në pranga në burgjet e vendeve evropiane. Historia e disa prej tyre përfundoi në tragjedi.
Shqiptarë të dhunuar nga policia dhe nëpër burgje janë kthyer në lajmet e ditës për disa vite tashmë. Por historia e 23-vjeçarit nga Shkodra, Florenc Beqiraj, na bëri të kuptojmë se asgjë nuk ka ndryshuar, pasi prej tre ditësh dergjet në shtratin e një spitali francez. Fajtorë për këtë janë policët e një burgu francez në Marsejë.
Ngjarja e dhimbshme e Beqirajt tregoi edhe njëherë racizmin që u bëhet shqiptarëve dhe mënyra sesi trajtohen refugjatët shqiptarë në Europë.
Dhuna dhe masakrimi i shqiptarëve në qelitë e burgjeve jashtë Shqipërisë është bërë publike prej vitesh, ndërsa disa nga rastet janë munduar të mbahen të fshehta dhe për disa të vërtetën e hidhur e kanë mësuar vonë edhe familjarët.
“Iconstyle.al” risjell në vëmendje historinë e shqiptarëve të dhunuar dhe masakruar nga policët e huaj në dy vitet e fundit (2016-2017):
Florenc Beqiraj – U dhunua pa mëshirë në burgun francez
Ky i ri shqiptar është rrahur për vdekje në një burg francez në Marsejë. Ai u kap duke punuar në mënyrë ilegale në një restorant, pa pasur dokumentet e duhura. Kërkonte azil politik dhe kishte ëndrra të mëdha. Kjo është mënyra sesi emigrantët shqiptarë trajtohen në një vend të Bashkimit Europian.
Ai ndodhej prej tre javësh në paraburgim pasi ishte kapur pa dokumentacionin përkatës të leje qëndrimit nga policia franceze. Familjarët e shqiptarit kanë denoncuar se dikush ka tentuar ta vriste në burg.
Këtë e vërteton një telefonatë e bërë disa ditë më parë, ku Florenci i shpjegonte kushërirës së tij se kishte probleme me personat që ndante qelinë dhe kishte frikë mos e vrisnin. Policia franceze pretendon se i riu shqiptar kishte tentuar të vetëvritej, por për dy ditë ai do të kthehej në atdhe dhe nuk kishte arsye të ndërmerrte këtë akt.
Aldo Laci – U dhunua në Aeroportin e Italisë
44-vjeçari shqiptar, Aldo Laci, ndërroi jetë në aeroportin e Malpensës në Itali, aty ku po priste bashkëshorten e tij. Mediat italiane shkruan më 6 dhjetor se ai ka qenë nën efektin e kokainës. Sipas familjarëve të viktimës shkak i vdekjes së tij është bërë goditja nga policia në qafë dhe shtrirja në tokë me dhunë, duke pësuar dhe goditje në zemër.
Në videon e aeroportit shihet qartë teksa i riu vrapon, ndërsa ndiqet nga 5 policë italianë. Ata e kanë ndaluar dhe goditur me dhunë. Familja e shqiptarit ka denoncuar policët nëpërmjet një avokati, të bindur se vdekja “u shkaktua drejtpërdrejt nga agresioni i forcave të policisë”.
Pëllumb Marinkolaj – U masakrua në qelinë greke
Tragjedia në gusht të 2016-s e shqiptarit 28-vjeçar nga fshati Rrile i Lezhës, Pëllumb Marinkolaj, pushtoi mediat vendase. Ai u dhunua për vdekje në mjediset e rajonit të policisë “Kato Patisia”, ndërsa ngjarja u mbajt e fshehur nga policia greke për më shumë se 10 ditë.
Pëllumb Marinkolaj jetonte si emigrant në Greqi. Ai ishte arrestuar për vjedhje duke bërë 8 vite burg. Në atë kohë gjykata e kishte liruar prej 4 muajsh, duke i dhënë një masë më lehtësuese, detyrim paraqitjeje. Më datë 3 gusht 2016 në orët e darkës ai u paraqit në rajon, por nuk doli i gjallë nga aty. Policia e dërgoi të vdekur në morgun e spitalit Erithros Stravros, Athinë, duke deklaruar se i riu shqiptar kishte rënë nga kati i katërt i godinës së rajonit.
Rastësisht pak minuta para se të futej në rajon, Pëllumb Marnikolaj telefonoi një shokun e tij. Gjatë bisedës i tha se do ta ritelefononte pasi të firmoste paraqitjen në rajonin e policisë. Miku i 28-vjeçarit priti telefonatën që nuk erdhi më. Miqtë e tij rrëfyen se trupi ka pasur shenja të dukshme të një dhune monstruoze. Pasi drejtuesit e varrezave janë ballafaquar me familjaret dhe miqtë, ato kanë thënë se trupi është sjellë i vdekur dhe ai do t’i dorëzohej familjareve me kushtin e vetëm, që të mos kishte denoncime dhe çështja të varrosej bashkë me të.
Shqiptari që u dhunua nga 8 policë grekë “për hakmarrje”
Më 16 janar të 2016-s u raportua se një shtetas shqiptar në Kretë u dhunua nga 8 policë, të cilët e ndoqën deri në hyrjen e apartamentit ku jetonte. Historia e shqiptarit 23-vjeçar lidhej me një konflikt të para një dite me njërin nga efektivët, me të cilin ishte zënë në rrugë kur ishte pa uniformë policie. Të nesërmen, për t’u hakmarrë ndaj shqiptarit, polici i shkoi së bashku me 7 kolegët e tij.
Ata iu sulën duke e goditur menjëherë sapo i hynë në apartamentit ku jetonte. Më pas e dërguan në komisariat, ku gjithashtu ushtruan dhunë ndaj tij.
Por denoncimi i policit ishte i ndryshëm nga ai i 23-vjeçarit. Sipas tyre ishin 5 dhe jo 8 policë, që janë takuar me shqiptarin. Sipas tyre ngjarja kishte ndodhur në një klub nate, ku efektivët i kërkuan shqiptarit të ndalonte, por ai iku me vrap. Ata thanë se pak më vonë u bë kapja e shqiptarit, i cili i sulmoi ata.
Hatip Xhelili – Policët gjermanë i thyen dy brinjë
Një shqiptar nga Maqedonia me banim në Gjermani ra pre e policisë vendase. Viktima tregoi se në vitin 12 maj 2016 një makinë policie ndaloi papritur tek këmbët e shqiptarit Hatip Xhelili duke e trembur. Ai fillimisht nuk reagoi dhe priti se çfarë do të ndodhte.
Pas disa çastesh ai i afrohet policëve për t’i pyetur se cili ishte shkaku i këtij ndalimi duke i thënë, se ata përfaqësonin popullin dhe ishin në mbrojtje të qytetarëve.
Kjo nuk i pëlqeu aspak policëve gjermanë të cilët pasi i drejtohen me sharje dhe ofendime e sulmojnë duke e goditur ku njëri prej tyre e kap për fyti dhe tjetri e godet me grushte derisa i thyejnë dy brinjë.
Xhelili raportoi për “Gazetën Impakt”, se jo vetëm që nuk është dëmshpërblyer për këtë dëmtim fizik e as është ndëshkuar fajtori, por përkundrazi ai gjendet i akuzuar nga policia gjermane, ai shprehet i vendosur se do ta çojë rastin deri në Strasburg dhe metodat raciste të policisë gjermane për ta trembur dhe detyruar të tërhiqet nuk funksionojnë aspak në rastin e tij.
Klodi Lesi – Fotoja që dëshmoi se u dhunua nga policia greke
Shqiptari Klodi Lesi u arrestua nga policia greke pasi masakroi me thikë shtetasen greke me të cilën kishte dy fëmijë. Disa prej mediave greke përmes një fotografie kur Lesi shihej në duart e policëve grek shkruajtën se ai shihej si i dhunuar. Provë, sipas tyre ishte kjo foto e bërë pak çaste pas prangosjes në afërsi të shtëpisë, ku ndodhi ngjarja e rëndë.
“Unë jam Ilia Kareli!”
Autoritetet policore greke janë vënë disa herë nën akuzë për ushtrim dhune ndaj emigrantëve shqiptarë. Rasti më flagrant ishte ai i rrahjes dhe torturimit deri në vdekje të Ilia Karelit nga 6 policë të burgut Nigrita, në vitin 2014, të cilët tashmë janë pas hekurave dhe po përballen me drejtësinë.
Me syrin e nxirë dhe plagë në qafë, para se të vdiste i burgosuri shqiptar, Ilia Kareli (Kudret Kume) u tha gardianëve grekë se “Dua vetëm të pushoj pak, jam shumë i lodhur”. Një infermiere në burg pati thënë se “nuk ka rëndësi shëndeti i tij”, ndërsa një gardian, pas rrahjes disaorëshe, e kishte pyetur se për çfarë kishte nevojë. Këto ishin disa dëshmitë e vitit të kaluar të 3 gardianëve grekë, në Gjykatën e Selanikut, gjatë procesit gjyqësor ndaj 14 punonjësve të burgjeve, të akuzuar për vdekjen e shqiptarit. Mes të akuzuarve është edhe drejtori i një burgu.
Përveçse me grushte e shkelma, marsin e vitit 2014, Kareli u rrah me shkopinj gome, iu vu tel elektrik në trup gjersa iu dëmtua zemra, u qëllua me leckë të lagur dhe ndaj tij u praktikuan arte marciale nga gardianët, gjersa dha shpirt në shtratin e burgut të Nigritës në Greqi.
Zemra e tij u soll në Tiranë, ku iu bë ekspertiza nga Mjekësia Ligjore. Kareli u transferua në Nigrita nga burgu i Malandrinos, ku kishte vrarë një gardian grek dhe pak para se të mbërrinte atje, e futën në një stacion policor. Mediat greke kanë publikuar dëshmitë e dy policëve që e shoqëruan nëpër burgje dhe të një gardiani në Malandrino, ku Kareli kishte bërë vrasjen.
