Blerta Josifi ka dalë nga spitali pasi i mbijetoi aktit vetëflijues në banesën e saj në Kombinat, që i mori jetën nënës së saj dhe motrës.
Dosja.al shkruan se ajo ka lënë ditën e djeshme ambientet e spitalit Psikiatrik të Tiranës, ku po kurohej që prej 2 korrikut. Gjendja e 34-vjeçares tani është e mirë dhe ajo po jeton me të afërmit e saj që premtuan se të renë do ta mbanin në shtëpinë e tyre.
Vajza nuk mund të rikthehet më në banesën ku nëna dhe motra e saj ndërruan jetë. Zhaneta Josifi, 56 vjeçe dhe Anisa Josifi 30 vjeçe, u gjetën pa jetë në banesë, ndërsa në gjendje të rëndë ishte edhe vajza tjetër, Blerta Josifi 34-vjeçe.
Trupi i motrës së saj “bashkëjetoi” për muaj me radhë me to dhe policia u tregua e ngathët në parandalimin e një tragjedie që në fakt ndodhi dhe ishte përtej kufijve të imagjinatës.
Kjo edhe për faktin se nuk kishte një denoncim konkret dhe të shkruar, por vetëm ankesa ku i kërkohej policisë të gjendej ku ishte Anisa Josifi që nuk po shfaqej kurrkund.
“Vetë familjarët nuk depozituan asnjëherë një ankesë konkrete, ata flisnin për ndryshimin e gjendjes , por sa herë trokisnim në shtëpinë Josifi dilte kryefamiljarja që pyeste çfarë problemi ka? Kë kemi shqetësuar?” argumenton një zyrtar i policisë së Kombinatit.
Megjithatë, një grua e moshuar, e cila jeton ngjitur me shtëpinë e Zhanetës, Anisës, dhe Blertës, kujton se një ditë, e trembur që asgjë nuk pipëtinte në apartamentin ngjitur u nis në këmbë në komisariatin e Kombinatit:
“Isha në polici katër muaj përpara se të zbulohej kjo tragjedi. Isha dhe e frikësuar. Ju tregova që diçka po ndodhte në shtëpinë Josifi. Nuk më morën seriozisht”.
/Iconstyle.al
