Këngëtarja e njohur shqiptare, Albërije Hadërgjonaj jeton prej kohësh në Shtetet e Bashkuara të Amerikës, por kur vjen puna për shëndetin, i beson vendlindjes së saj. Dozën e vaksinës anti-Covid, ajo e mori në Deçan.
Artistja publikoi një video nga momenti kur ajo dhe e motra u vaksinuan. Me këtë rast, Albërija dha një këshillë publike për të gjithë ndjekësit e saj. Ajo u sugjeroi të gjithëve të marrin vaksinën, pasi pritet një valë tjetër e Covid-19.
Hadërgjonaj është shprehur e lumtur që e mori vaksinën në vendin ku ka prejardhjen.
Së fundmi, e ftuar në emisionin “Oxygen Show” ajo tha se aktualisht punon si agjente shitjesh, së objekteve, tokave. Ndër të tjera ajo tha se po mendon që të hapë agjencinë e saj në SHBA.
Kohë më parë, në një intervistë në emisionin “Top Show”, Albërija tha se rikthimin në Shqipëri, e kishte menduar disa herë, por ishte Anxhelina, ajo që i jepte forcë.
“Shkojmë në Amerikë dhe nuk po gjenim shtëpi sepse gjithçka lidhej me kreditin bankar që ke, unë nuk kisha asgjë. Ishte një agjent shqiptar që na gjeti në shtëpi, e i lutem ta mar shtëpinë, por më thotë se është e pamundur. I hapa ‘Youtubin’, e i thashë se jam artistike. Nuk jemi popull kot. Më lejoi ta merja shtëpinë, me kushtin që duhet ta paguaja për një vit. Qyqa ikën lekët, mendova, tani do rri pa bukë. Është traumë kur ngel pa para, është problem i madh. Kur ke besim në vetvete çan male dhe dete, nuk ka çfarë të ndal. U sistemuan në shtëpi, blem një dyshek me Anxhelinën, edhe e vendosëm në tokë. Mirëpo mbetëm pa para. Ishte Anxhelina, ajo që më tha: ‘Marim qumësht, marim edhe miell dhe bëjm krepa’. Anxhelina, është fëmijë me këmbë në tokë. Ti mos e vrit mendjen, i thashë se do të gjej unë punë. E nisa të këndoj edhe në dasma” –tregoi Albërie Hadërgjonaj.
