Gjatë ditës së sotme në media u raportua se këngëtari Bujar Qamili ishte prekur nga Covid-19 dhe se ishte në gjendje të vështirë shëndetësore. Thuhej se Qamili kishte disa ditë që është infektuar me koronavirus dhe se së fundmi gjendja e tij ishte përkeqësuar.
Dosja.al raportoi se ai ndodhej në terapi intensive në spitalin Infektiv. Thuhej se artisti po merrte ndihmën mjekësore nga mjekët dhe infermierët e spitalit. Mirëpo duket se këto lajme nuk janë të vërteta, sepse Bujar Qamili është në gjendje të mirë shëndetësore.
Miku i tij, Ramazan Çeka, që ka shkruar disa tekste këngësh, ka treguar për “abcnews.al” se Qamili është mirë dhe se të gjitha janë mashtrime. Ai është shprehur se këngëtari i njohur nuk ka asnjë problem shëndetësor dhe se vetë Çeka ka komunikuar së fundmi me artistin.
“Lajmet e përhapura në media nuk janë të vërteta, mashtrime. Nuk është e vërtetë që Bujar Qamili është në gjendje të rëndë nga covidi. Unë përpara 5 minutash fola në telefon dhe ishte shumë mirë.
Është si kokrra e mollës. Ka pasur një problem me veshkat gjatë qëndrimit në Itali, por tani është shumë mirë” tha Çeka.
Deri tani kanë qenë disa figura publike që janë infektuar nga Covid-19, si: Diona Fona, Florjan Binaj, Stresi, Art Abazi, Nora Malaj, Rajmonda Bulku, Ledio Lako, Gent Sejko, Agron Llakaj, Albin Kurti, Blerina Gjylameti, Xhani Shqerra, Alketa Vjesiu, Valton Krasniqi, Xherdan Shaqiri, Silva Bino, Arjola Shehu, etj.
