Ardhja e këngëtarit grek Notis Sfakianakis në Shqipëri për koncert ngjalli shumë polemika e pakënaqësi tek vendasit dhe disa prej artistëve tanë.
Kjo për shkak se ai dikur ka qënë pjesë e parties “Agimi i Artë” në Greqi dhe i ka sulmuar dhe ofenduar shqiptarët duke i konsideruar si rracë inferiore dhe kokëpalarë.
Gjithsesi pasi erdhi në vendin tonë ai u përpoq të sqaronte duke deklaruar se gjithçka ishte manipulim i mediave dhe ai kurrë nuk e ka share Shqipërinë.
“Nuk i kam thënë kurrë këto fjalë, mediat më kanë manipuluar. Dhe fakti që këtu jemi në Iliri kjo i thotë të gjitha” – tha Sfakianakis në një intervistë për Top Channel.
Gjithashtu ai shtoi duke folur shqip: “Ju dua shumë, ju pres në Pallatin e Kongreseve”.
Por deklaratat që këngëtari bëri në Shqipëri nuk u kanë pëlqyer aspak vendasve dhe bashkëpunëtorëve të tij. Madje autori i disa këngëve të tij Giorgos Moukidis i ka ndaluar të këndojë këngët e shkruara nga ai.
“Ndalohet shfaqja publike e këngëve të mia nga ana juaj zoti Notis Sfakianakis. Me një urdhër që do të publikohet në ditët në vazhdim, unë e ndaloj shfaqjen publike të këngëve të mia nga këngëtari Notis Sfakianakis” – ka shkruar Moukidis në një postim në Facebook.
Ai nuk ka sqaruar pse e ka marrë këtë masë ndaj Notis, por sipas mediave greke arsyet janë deklaratat që këngëtari bëri në Shqipëri.
