Të gjithë u çuditën me reagimin shpërthyes të këngëtarit Redon Makashi, pasi Eugent Bushpepa u shpall fituesi i Festivalit të RTSH-së.
Makashi doli i dyti në këtë garë me këngën “Ekziston”, por zhgënjimi i tij ishte i madh pasi ai priste që të fitonte. Përmes një postimi në Facebook, këngëtari tha se e vrau me duart e tij këngën ende pa lindur, duke rrëfyer se ishte betuar që nuk do të merrte më pjesë në Festivale.
Ndërkohë, gjatë një interviste për emisionin “Chaud Patate” Redoni tha se reagoi aq ashpër, pasi pa disa gjëra që ndodhën në festival dhe nuk i pëlqyen:
“Të gjithë mund të kishin një reagim të tillë, sepse unë pashë disa gjëra të brendshme që nuk dua t’i shpreh tani këtu, prandaj ishte ndoshta ai lloj reagimi. Megjithatë mund të them se ky Festival kishte mjaft materiale të mira dhe gjynah që këngët e tjera mos të jepen”.
I pyetur se cilin nga dy kompeticionet vlerëson më shumë, “Këngën Magjike” apo Festivalin e fundvitit, ai zgjodhi të parën, duke e arsyetuar se ai kompeticion i promovon më mirë artistët dhe të gjitha këngët pjesëmarrëse:
“Kënga Magjike i kuron më mirë këngët, ndërsa Festivali e ka humbur vlerën që kur është futur Eurovisong. Për mendimin tim më mirë të bëhen disa lloje festivalesh sepse bëhet qëllim në vetëvete dhe prish ekuilibrin e festivalit. Ore ka pas lezet atëherë kur prisje jurinë e filan rrethi, ku dhe vendi pestë ishte si vendi i tretë, domethënë kënaqeshin njerëzit dhe vërtetë kishte një vlerë tjetër. Këtë bën dhe Kënga magjike, i kuron/promovon këngët si atë të fundit dhe këngën e parë”, u shpreh Redoni.
