E mbijetuara e dhunës seksuale nga forcat serbe dhe aktivistja Vasfije Krasniqi Goodman, dëshmoi të martën paradite në Kongresin amerikan.
Në seancën që u quajt “Viktimat e kohës së luftës në Kosovë: Kërkimi për drejtësi” u dëgjuan dëshmitë edhe të ish-presidentes së Kosovës Atifete Jahjaga, avokatit të drejtësisë Ilir Bytyqi dhe avokatit ndërkombëtar të SHBA-ve, Paul Williams.
Vasfije Krasniqi tha se ishte shumë e rëndësishme që zëri i tyre u dëgjua dhe se shpreson që përmes angazhimit të Kongresit Amerikan, të çohet drejtësia në vend.
“Është një çështje që është dashur të hapej edhe më herët. Pak me vonesë, por më mirë vonë se kurrë dhe unë e kam kauzën për të luftuar për drejtësi dhe për të thyer stigmën jo vetëm në Kosovë, por edhe në gjithë botën, ku kanë ndodhur dhunime gjatë luftërave”.
Krasniqi-Goodman, e cila ishte një nga gratë e para në Kosovë që ka ndarë publikisht përvojat e saj të dhunës seksuale gjatë luftës në Kosovë (lexo këtu), i bëri thirrje komitetit për të adresuar mosndëshkimin e krimeve të luftës dhe abuzimeve të të drejtave të njeriut që janë kryer në Kosovë.
“Kanë kaluar njëzet vjet dhe drejtësia vazhdon të më zhgënjejë. Ai që më dhunoi nuk është përgjegjës për krimet e tij dhe është ende i lirë “, tha Krasniqi-Goodman në dëshminë e saj, pasi tregoi përvojën e saj gjatë luftës.
Krasniqi-Goodman u përdhunua, u torturua dhe u keqtrajtua nga një oficer i policisë serbe dhe një njeri tjetër në prill të vitit 1999 kur ishte 16 vjeç.
Vasfija ishte dje edhe në protestën që mbajtën përfaqësues të komunitetit shqiptaro-amerikan, para ambasadës serbe në Uashington, ku kërkuan drejtësi për krimet e kohës së luftës.
Ajo e pranon se për të nuk ishte e lehtë të protestonte para ambasadës së Serbisë.
“Por kjo është që t’ju tregojmë atyre se ne nuk ndalemi para se drejtësia të shkojë në vend dhe këta t’i pranojnë krimet që kanë kryer, të kërkojnë falje për krimet dhe t’i dënojnë kriminelët. Kështu që ndihem krenare që jam para ambasadës serbe, për t’iu treguar këtyre që ne shqiptarët duam drejtësi. Jo hakmarrje, por drejtësi”, thotë ajo.
