Ajo është cilësuar si një ndër pretendentet kryesore për të fituar këtë vit çmimin e parë në festivalin “Kënga Magjike”, dhe jo më kot.
Rozana Radi vjen këtë vit me një këngë tepër emocionuese dhe histori njerëzore ku mjaft nëna mund të gjejnë veten. Por së fundmi, vlerësimin për këngën, Rozana e ka marrë nga një baba, i cili e përgëzon për tematikën e përzgjedhur.
“Ma thuaj ti” quhet balada që trajton temën e gruas dhe të gjithë sakrificën që ajo bën për të mbajtur të fortë dhe të qëndrueshme familjen e saj. Projekti i Rozanës gjeti mbështetje të konsiderueshme në radhët e artistëve, pasi shumë prej tyre e publikuan këngën e Rozanës në profilet në rrjetet sociale.
