Ditë e fundit në mediat botërore qarkulloi lajmi i ndarjes së çiftit të njohur, Ariana Grande dhe Mac Miller. Pas një lidhjeje 2-vjeçare u mësua se dyshja e njohur i ka dhënë marrëdhënies së tyre dhe për këtë thuhet se u bë shkak karriera e tyre, e cila u zinte pjesën më të madhe të kohës.
Pasi lajmi bëri xhiron e mediave botërore, ka reaguar për herë të parë Ariana Grande nëpërmjet një postimi emocionues në Instastory. Ajo ka publikuar një foto ku shfaqet së bashku me Miller dhe e ka cilësuar atë si një ndër miqtë e saj më të mirë.
“Përshëndetje! Ky është një nga miqtë e mi më të mirë në të gjithë botën dhe ndër më të preferuarit në planet, Malcolm Mccormick. E respektoj dhe e adhuroj pafund si dhe jam e lumtur që e kam atë në jetën time në çfarëdolloj forme, në çdo kohë pa u penduar se si marrëdhënia jonë po ndryshon dhe se çfarë ka rezervuar universi për ne.”, shkruan këngëtarja e famshme.
Ndërsa me shprehjen që ka lënë më poshtë duket sikur Ariana ka dashur të konfirmojë edhe një herë të gjithë zërat që flasin për ndarjen e tyre.
“Dashuria pa kushte nuk është egoiste. Është të duash më të mirën për dikë edhe pse për momentin, kjo e mirë nuk je ti.”, përfundon Ariana.
Në fund të postimit të saj Grande shprehet se ndihet krenare për reperin e njohur dhe se do ta mbështesë gjithmonë atë.
“Mezi pres të dëgjoj nga ty dhe të të mbështes gjithmonë. Jam krenare për ty!!”, thotë Grande.
