Këngëtarja shqiptare Eliza Hoxha ka folur për herë të parë pasi autoritetet serbe i ndaluan hyrjen në Serbi.
Ajo ishte nisur për të qenë pjesë e festivalit të përvitshëm që mbahet në Beograd ”Mirdita DobrDan”. Por autoritetet nisën të kontrollonin valixhen e saj një për një, dhe i bllokuan disa prej veprave të saj artistike.
Në një intervistë për Televizionin Publik, Eliza tha se autoritetet serbe i ndaluan asaj 3 fotografi:
”Më ndaluan 3 fotografi, njëra me pamfletin e UÇK-së, fotoja e dytë është nga protestat ku shihet afishja me vargun e poetit Ali Podrimja: Kosova, gjaku ynë që nuk falet…”, ka thënë Hoxha.
Artistja kosovare po ashtu ka treguar se fotografia e tretë që iu ndalua të jetë pjesë e ekspozitës në kuadër të festivalit ”Mirëdita-Doberdan”, është konceptuale dhe paraqet “lojën” mes flamujve të Shqipërisë dhe Kosovës, e cila ishte edhe inspirim për ekspozitën e saj në Beograd me titull: “Midis ëndrrës dhe realitetit”.
Ky punim sipas Hoxhës është realizuar në njëvjetorin e pavarësisë, mbi debatin për flamurin dhe himnin.
Pas kontrollit, artistët u lejuan të kalojnë kufirin në drejtim të Beogradit.
