Ikona e kinematografisë shqiptare, Rikard Ljarja, mbylli sytë përgjithmonë mbrëmjen e 20 prillit.
Ai vuante prej kohësh nga një sëmundje e rëndë dhe prej ditësh po qëndronte në shtëpi, në pamundësi për të lëvizur.
Ljarja u shuajt në moshën 77-vjeçare duke lënë pas një karrierë të pasur në kinematografi.
Sipas “Panorama.com”, para se të ndërronte jetë, aktori i mirënjohur i kishte lënë një amanet familjarëve të tij.
Ai dëshironte të varrosej në qytetin e tij të lindjes, në Shkodër.
Kjo është humbja e dytë e madhe për Shkodrën, pas vdekjes së aktorit Gëzim Kruja.
Për shkak të emergjencës Covid-19, askush prej aktorëve nuk po përcillet me nderimet e merituara në banesën e fundit.
Për kujtesë, Ljarja u bë tepër i njohur për publikun shqiptar me rolin e “Dedës” në filmin “Rrugë të bardha”.
Ai punoi si aktor i teatrit në Teatrin “Migjeni” në Shkodër.
Që prej vitit 1973 deri në vitin 1996 ai ishte aktor, skenarist dhe regjisor i filmave të kinostudios.
Nga viti 1996 deri në vitin 2002, ishte drejtor artistik në televizionin publik shqiptar, kur doli edhe në pension.
Ndër filmat e tij të famshëm përmendim “Fletë të bardha”, “Pesha e kohës”, “Rrugë të bardha” etj.
Gjatë viteve të fundut, Rikard Ljarja kishte botuar edhe disa libra.
