Qendra Spitalore Universitare në Tiranë ka reaguar për vdekjen e 12-vjeçarit, Leo Sadiku, i cili po kurohej për një virozë. QSUT shprehet se i mituri ishte diagnostikuar me miokardit akut, një sëmundje e rrallë dhe e rrezikshme, e cila shoqërohet me shkallë të lartë të vdekshmërisë.
Reagim për mediat lidhur me rastin e pacientit L.S., 12-vjeç
QSUT i shpreh ngushëllimet më të thella familjes së 12-vjeçarit L.S në këtë moment të vështirë.
Nisur nga interesi i publikut për rastin tragjik të ndarjes nga jeta të 12-vjeçarit, informojmë se pacienti L.S. është hospitalizuar në Spitalin Pediatrik të QSUT më datë 7 janar 2024 dhe ka ndërruar jetë më datë 8 janar 2025, në orën 01:45, në Shërbimin e Terapisë Intensive Pediatrike. Pas ekzaminimeve të kryera, pacienti është diagnostikuar me miokardit akut, një sëmundje e rrallë dhe e rrezikshme, e cila shoqërohet me shkallë të lartë të vdekshmërisë.
Pavarësisht kujdesit maksimal dhe trajtimeve të kryera sipas protokolleve mjekësore, ndarja nga jeta e pacientit ka qenë e pamundur të parandalohet.
Duke mirëkuptuar dhimbjen e familjes dhe interesin e publikut, QSUT riafirmon përkushtimin për transparencë dhe për ofrimin e trajtimeve më të mira për çdo pacient.
Leo Sadiku, 12-vjeç nga fshati Pocestë i Maliqit ndërroi jetë mëngjesin e së mërkurës, 8 janar 2025, në Qendrën Spitalore Universitare të Tiranës. I mituri ishte transportuar një ditë më parë në gjendje të rëndë nga Spitali i Korçës drejt QSUT me tension të lartë, të vjella dhe temperaturë.
12-vjecari ka humbur jetën nga miokarditi që është një sëmundje inflamatore e indit muskulor të zemrës. QSUT shpjegon se i mituri u shtrua në Pediatrinë e QSUT më datë 7 janar 2025 dhe ka ndërruar jetë më datë 8 janar 2025, në orën 01:45. Për shkak të moshës së re dhe rrethanave të vdekjes së papritur, Policia e Korçës ka nisur hetimet për të zbuluar nëse ka pasur neglizhencë mjekësore sepse i mituri ishte shtruar në spitalin e Korçës në fund të dhjetorit me simptoma të gripit, temperaturë dhe të vjella.
Pasi është mbajtur nën kujdesin e mjekëve gjendja e tij ishte përmirësuar dhe ka dalë nga spitali më 31 dhjetor. Por me 7 Janar është përkeqësuar dhe është rikthyer në spital. Mjeket e Korçës e kanë nisur në Tiranë për mjekim të specializuar.
Jashtë kamerës, familjarët thanë se djali ka qenë i shëndetshëm dhe nuk ka vuajtur nga asnjë sëmundje. Ata kane pretendime se fëmija s’ka marrë mjekimin e duhur.
“Djalin nuk e trajtuan siç duhej, e shtruan tek reparti i COVID-it, në një moment ai shtrëngon gjoksin fort aty e marr në krah për ta çuar tek urgjenca dhe rrugës djali më mbaroi në krah. A mundet që nga një virozë djali të humbasë jetën?!”, thanë të trishtuar.
Familjarët theksojnë se fëmija nuk vuante as nga diabeti as nga zemra por nga mjekimet e shumta që mori në spital, ditën e fundit diabeti i shkoi 200.
