Pas dy ditësh është bërë publik informacioni zyrtar nga Policia e Tiranës për vrasjen e Arben Gjecit.
Në lidhje me vrasjen e ndodhur në fshatin Bastar i Mesëm në Tiranë, raportohet nga policia se kanë përfunduar në pranga tre persona si të dyshuar.
Ngjarja ka ndodhur mbrëmjen e 24 janarit, ku burime konfidenciale bëjnë me dije se tre persona E.C., 31 vjeç, D.K., 29 dhe E.C., 20 vjeçe goditën me sende të forta 34-vjeçarin.
Thuhet se viktima kishte lidhje dashurie me njërën nga gratë e familjes së autorëve.
Këta të fundit mes tyre edhe një 20-vjeçare kanë ‘kapur mat’ 34-vjeçarin me gruan e njërit prej autorëve dhe më pas e kanë masakruar duke e goditur me sende të forta në kokë.
Kanë qenë banorët e zonës ata të cilët e kanë gjetur Gjecin në rrugë dhe e kanë dërguar në spital.
34-vjeçari ndërroi jetë në spitalin e Traumës, pasi nuk mundi t’u mbijetonte plagëve të marra.
Sipas ekspertizës 34-vjeçari kishte marrë katër goditje në kokë, që i morën edhe jetën.
Njoftimi i plotë nga policia:
Zbardhet ngjarja e ndodhur në mbrëmjen e 24 janarit në fshatin Bastar i Mesëm, ku humbi jetën një shtetas.
Pas një pune intensive dhe të pandërprerë 48 orëshe, Policia e Tiranës në bashkëpunim me Prokurorinë e Rrethit Gjyqësor Tiranë ka zbardhur rrethanat dhe arrestuar 3 persona, për një ngjarje të raportuar në nisje si një vdekje aksidentale.
Dyshohet se shtetasi E.C., më datë 24 janar 2019, rreth orës 20:30, në fshatin Bastar i Mesëm ka goditur me sende të forta në kokë shtetasin A.Gj., 34 vjeç, duke i shkaktuar dëmtime të rënda në kokë. Për pasojë i riu humbi jetën në Spitalin e Traumës.
Ngjarja u raportua si aksidentale. Por hetimet provuan të kundërtën. Në polici u shoqëruan disa shtetas dhe u kryen disa veprime komplekse hetimore në konfidencialitet të plotë.
Në vijim të këtyre veprimeve, dyshohet se shtetasit D. K., dhe E. C., me veprimet dhe mos veprimet e tyre kanë fshehur të vërtetën e ngjarjes së ndodhur. Gjithashtu nga kontrolli i ushtruar në banesë u gjet edhe një sasi lënde e dyshuar kanabisi.
Shërbimet e Policisë Tiranë bënë arrestimin e shtetasve:
– E.C., 31 vjeç, për veprën penale “Plagosje e rëndë me dashje me pasojë vdekjen”;
– D.K., 29 vjeç, për veprën penale “Veprime që pengojnë zbulimin e së vërtetës” dhe “Prodhim dhe shitje të lëndëve narkotike”;
– E.C., 20 vjeçe, për veprën penale “Veprime që pengojnë zbulimin e së vërtetës”.
Për shkak të hetimeve nuk mund të jepen detaje të tjera, ndërkohë materialet i kaluan për veprime të mëtejshme Prokurorisë së Rrethit Gjyqësor Tiranë.
