Disa prova të reja janë zbuluar nga prokuroria për vrasjen në ish-Bllok më 4 tetor, që rëndojnë pozitën e Ervis Martinaj, aktualisht në burg.
Sipas “BalkanWeb” disa ekspertë izraelitë kanë zbuluar biseda në aplikacionin WhatsApp të Martinajt me miqtë e tij, pak minuta para ngjarjes ku mbeti i vrarë Fabian Gaxha.
36-vjeçari Martinaj kishte komunikuar me viktimën por edhe disa miq të tjerë të cilëve u ka kërkuar të afrohen dhe të paraqiten aty të pajisur me armë.
Pra, sipas prokurorisë nuk ka qenë takim i rastësishëm, siç ka thënë Martinaj në dëshminë e tij dhe sherri nuk ka pasur si shkak ngacmimet e këngëtares Elvana Gjata por konflikte të mëparshme. Kjo është një provë e re por ekspertiza e telefonit mund të nxjerrë të tjera detaje.
“Por zhvillimi tjetër nga hetimet për vrasjen në Bllok të shokut të Vis Martinaj është fakti se Prokuroria shqiptare ka kërkuar ndihmë juridike nga shteti i Izraelit. Telefoni i Martinaj është dërguar për t’u ekspertuar nga ekspertë izraelitë. Dy ditë më parë ka ardhur përgjigje nga Izraeli dhe ekspertët izraelitë kanë arritur të zbërthejnë telefonin dhe të nxjerrin të dhëna që mund të konsiderohen si ‘minierë ari’. Por këto të dhëna nuk nxirren ende për shkak të hetimit. Ekspertiza e ardhur nga Izraeli do paraqitet në gjykatë. Prokuroria do këmbëngul që Martinaj të mbetet në burg pasi sipas saj ka prova të forta”, raportoi gazetarja Klodiana Lala.
Aktualisht për ngjarjen policia ka shpallur në kërkim Ervin Matën, i dashuri i këngëtares Elvana Gjata, Fabio Alushi dhe truproja i këngëtares, Meviol Billo.
/BalkanWeb
