Bill Gates dhe bashkëshortja e tij, Melinda janë divorcuar pas 27 vitesh martesë. Pasuria e tyre kap shifrën marramendëse prej 127 miliardë dollarësh. Këtë lajm e bëri të ditur vetë themeluesi i Microsoft, i cili njoftoi ndarjen në nëpërmjet një postimi në “Twitter”.
“Pas një mendimi të gjatë dhe shumë pune, ne kemi marrë vendimin për t’i dhënë fund martesës sonë. Gjatë 27 viteve të fundit, ne kemi rritur tre fëmijë të mrekullueshëm dhe kemi ndërtuar një fondacion që punon në të gjithë botën për t’i mundësuar të gjithë njerëzve të bëjnë jetë të shëndetshme dhe produktive.
Ne vazhdojmë të ndajmë një besim në misionin tonë dhe do të vazhdojmë të punojmë së bashku në fondacion, por nuk besojmë më se mund të rritemi së bashku si çift në fazën e ardhshme të jetës sonë. Ne kërkojmë hapësirë dhe privatësi për familjen tonë”, tha Bill Gates në këtë deklaratë të papritur.
Në lidhje me lajmin e ndarjes ka reaguar edhe vajza e Bill Gates, Jennifer Gates. Vajza më e madhe e çiftit të njohur ka ndarë një mesazh me ndjekësit e saj në rrjete sociale.
“Shumë prej jush kanë dëgjuar lajmin se prindërit e mi janë ndarë. Ka qenë një kohë sfiduese për familjen tonë. Unë po mësoj ende si të mbështesë procesin dhe emocionet e mia, njësoj si pjesëtarët e tjerë të familjes. Nuk do të komentoj asgjë më shumë rreth ndarjes, por ju lutem dijeni që fjalët tuaja të mira dhe mbështetja do të thonë shumë për mua”, shprehet Jennifer në deklaratën e saj.
Më pas ajo falenderoi të gjithë miqtë e ndjekësit e saj që respektojnë dëshirën e tyre për privatësi në këtë fazë të vështirë në jetën e tyre.
