Feronit Shabani, i njohur me emrin artistik Fero, u dënua me 1 mijë euro gjobë për veprën penale të armëmbajtjes pa leje.
Aktgjykimi ndaj tij u shpall të mërkurën nga gjykatësi Avni Syla. Feros i është vendosur 1 mijë euro gjobë për armëmbajtje pa leje. Aktakuza për këtë rast është ngritur nga Prokuroria Themelore në Prishtinë, më 13 shkurt 2020.
Sipas aktakuzës, ekziston dyshimi i bazuar mirë se Mehmet Elshani, më 22 mars 2018, rreth orës 13:15, pikërisht në rrugën “Iliaz Kodra” në Prishtinë, me dashje ka përdorë forcën ndaj të dëmtuarit Lorent Bajrami, pa pëlqimin e tij.
Në dispozitivin e tretë të kësaj aktakuzë thuhet se në kohën dhe vendin e njëjtë të cekur si më lartë, i pandehuri Feronit Shabani ka mbajtur në pronësi, kontroll dhe posedim një Elektroshok me bateri të firmës TË-801TYPE, në shkelje të ligjit të zbatueshëm lidhur me armët e tilla.
Me këtë, Shabani akuzohet se ka kryer veprën penale “Mbajtja në pronësi, kontroll ose posedim të paautorizuar të armëve” nga neni 374, paragrafi 1 të Kodit Penal të Republikës së Kosovës, e cila dënohet me gjobë deri në shtatëmijë e pesëqind (7.500) Euro ose me burgim deri në pesë (5) vjet
Reperi Fero është shprehur i penduar pas dënimit me gjobë për armëmbajtje pa leje. Në një intervistë në Kosovë, Feronit Shabani i ka bërë thirrje të rinjve të mos mbajnë armë me vete, por të fokusohen më shumë te familja.
” I them gjithë të rinjve, që mbajnë gjëra jo të ligjshme, mos të mbajnë gjëra jo të ligjshme me vete. Të fokusohen më shumë te familja, ti duan njerëzit edhe t’i lënë problemet “,- u shpreh Fero.
