Bajron Nikolli është një djalë i ri shqiptar që jeton në Itali dhe ka qenë dëshmitar i kërdisë që ka bërë virusi në një nga zonat me shpërthimin më të madh, në Bergamo.
Ai u bën apel të gjthë shqiptarëve që të mos bëjnë gabimin e italianëve që e nënvlerësuan virusin dhe sot ka aq shumë të infektuar atje saqë nuk ka vende nëpër spitale.
Nikolli hedh poshtë deklarimet se pandemia prek vetëm të moshuarit duke thënë se shumë të rinj kanë rezultuar viktima të kësaj epidemie.
I riu bën thirrje të qëndrojmë në shtëpi si e masa e vetme e cila momentalisht ndihmon në përmirësimin e situatës. Ai tregon sesi edhe në Itali të rinjtë u bënë me nerva pasi i mbyllën në shtëpi, por sot ka arritur kulmi me vdekjet dhe nuk ka vende as në varreza.
“Në lagjen time njerëzit po vdesin, është një numër shumë i madh, nuk janë ato numra që shikoni në televizor, janë më shumë se aq, vdesin nëpër shtëpi pa asnjë test. Në Bergamo, në spitalin më të mirë të Europës nuk ka asnjë vend për pacientët, nuk të përgjigjet dot njeri nëse ke një emergjencë. Edhe nëse e marrin pas pak kohe e kthejnë në shtëpi sepse nuk kanë ku e mbajnë. Sot pas një muaj po vjen kulmi e shpresoj të përfundojë sa më shpejt. Ky virus vret, harrojeni çfarë thonë të tjerët, jo nuk kap të rinjtë se kap vetëm pleqtë, ka vrarë edhe të rinj.
Ju lutem shumë, qëndroni nëpër shtëpi, është një luftë që mund t’i bëhet rezistencë vetëm përmes kësaj mënyre. Ju lutem mos mendoni vetëm për vete, ndihmoni të varfërit, përcilleni mesazhin që kush ka mundësi të ndihmojë njerëzit në nevojë që të sigurojnë së paku bukën e gojës. Me gjithë zemër uroj që të mos e provoni kurrë këtë që po kalojmë ne këtu”, thotë Nikolli.
