Zëvendësministri i Arsimit, Ervin Demo, dha sot dorëheqjen pas akuzave për plagjiaturë. Ai njoftoi vendimin e tij përmes një statusi në ‘Facebook’.
Demo theksoi se ishte vënë në shënjestër nga politika e baltës, duke shkruar:
“Çdo argumentim nga ana ime kundër baltosjes në pozicionin që jam sot, do të paragjykohej vetiu dhe do të linte vend për keqinterpretime, nëse unë do të mbetesha në pozicionin tim”.
Ai u akuzua për plagjiaturë nga studiuesi Taulant Muka, që postoi foton e një artikulli të publikuar nga Demo dhe ku rezulton se një pjesë e konsiderueshme e tij është kopjuar nga libri i Janet Morrison. Sipas Mukës materiali është publikuar në vitin 2012 në Revistën shqiptare Social Ekonomike me bashkëautor zëvendësrektorin e Universitetit të Tiranës, Bernard Dosti.
Ervin Demo ka mbajtur më parë postin e zv/Rektorit të Universitetit të Tiranës, për t’u përzgjedhur në vitin 2017-të si zv/ministër i Arsimit.
Postimi i plotë:
Gjatë 2 javëve të fundit jam vënë në shënjestër nga politika e baltës dhe besoj se në radhë të parë më takon të vë interesat e kabinetit qeveritar mbi interesin tim personal. Unë i jam thellësisht mirënjohës Kryeministrit për mbështetjen e Tij të pakushtëzuar, të Ministres së Arsimit, Rinisë dhe Sporteve po ashtu, si edhe të gjithë atyre që ma bënë kaq sfiduese, dinamike e të bukur pse jo, këtë fazë të karrierës sime.
Sot kam ofruar dorëheqjen si zëvendësministër dhe mbetem i përkushtuar në vijimin e përpjekjes sonë të përbashkët, si qytetarë e si veprimtarë të Partisë Socialiste.
Çdo argumentim nga ana ime kundër baltosjes në pozicionin që jam sot, do të paragjykohej vetiu dhe do linte vend për keqinterpretime, nëse unë do të mbetesha në pozicionin tim.
Besimi e mbështetja e deritanishme, më mjaftojnë e teprojnë kur thotë populli. Besoj fort që koha do t’i vërë më shpejt se vonë gjërat në vend dhe unë do të jem në pozicionin e duhur për ta ndihmuar këtë proces.
Ministria e Arsimit, Sportit dhe Rinisë, ka disa muaj që po përgatit fillimin e “Verifikimit të kritereve të ligjshmërisë” (VKL) për të gjithë titujt dhe gradat e akorduara nga IAL-të në vend, gjatë 10 viteve të fundit.
Nuk do të dëshiroja kurrë që në pozicionin e zëvendësministrit, të isha une vetë arsyeja për ta paragjykuar këtë element kaq të rëndësishëm të reformës sonë rrënjësore. Proçese të tilla transparente, rigoroze dhe të drejta, janë rruga e vetme për të krijuar një qasje të re në sistem për arsimin që aspirojmë dhe kontribuar në kulturën e duhur organizative në promovimin e stafeve akadamike dhe kërkuesve të rinj.
Do të jetë tejet e vështirë, po pikërisht për këtë arsye jam sot më i bindur se kurrë që vetëm nën drejtimin aktual, të Kryeministrit Rama dhe Partisë Socialiste që reformat jetike për vendin, do të vijojnë të ecin me vendosmëri në drejtimin e duhur. Për mua ka qenë një privilegj të kem qenë pjesë e kabinetit Rama. Tanimë do të jem i tëri në dispozicion të veprimtarisë sime politike mes njerëzve të zakonshëm. Shumë faleminderit dhe mirënjohje e respekt të gjithë kolegëve të kabinetit.
