Lajmet për largimin e moderatorit Turjan Hyska nga televizioni “Vizion Plus”, me sa duket po konfirmohen.
“Express” mëson se në muajin qershor, Turin jo vetëm do ta shohim në televizionin “Klan”, por ai do të marrë me vete aktorët e humorit të spektaklit të së martës “Apartamenti 2XL”.
Pra bashkë me Turin, televizionit “Klan” thuhet se do t’i bashkohen edhe aktorët e njohur të humorit si Julian Deda, Albano Bogdo, Cubi etj. Kujtojmë se Julian Deda, veç aktorit në “Apartamentin 2XL” është edhe në jurinë e “Dancing With The Stars” në “Vizion Plus”, spektakël i cili deri në muajin qershor përfundon.
Turi pritet të marrë postin e Drejtorit Ekzekutiv të Televizionit “Klan Plus”. Kontrata është firmosur – thanë burime të sigurta për Express – edhe pse vetë moderatori nuk e ka pranuar një fakt të tillë, duke thënë se do të vijojë të jetë pjesë e Vizion Plus. Edhe më herët, Turi u fotografua në ambientet e televizionit Klan, i ulur në kafe me pronarin e këtij televizioni Aleksandër Frangaj.
Ndërkohë ende nuk dimë se çdo të ndodhë me moderatoren Orinda Huta, e cila drejton emisionin “Cover” në “Vizion Plus”. Nuk dihet nëse Turi do ta marrë me vete në “Klan” apo do të vijojë me programin e saj.
/Express
