Presidenti amerikan, Donald Trump, ka deklaruar se Izraeli dhe Hamasi kanë nënshkruar fazën e parë të një marrëveshjeje historike për paqen, të cilën e quan “Plani ynë i Paqes”. Përmes një postimi në rrjetet sociale, Trump njoftoi se marrëveshja parashikon lirimin e të gjithë pengjeve dhe tërheqjen e trupave izraelite në një vijë të caktuar, si hap i parë drejt një paqeje të qëndrueshme.
“Kjo do të thotë se TË GJITHË pengjet do të lirohen shumë shpejt, dhe Izraeli do të tërheqë trupat e tij deri në një vijë të rënë dakord,” shkruan Trump. Ai e cilëson këtë si një moment vendimtar që i hap rrugë një “Paqeje të Fortë, të Qëndrueshme dhe të Përjetshme”.
Trump thekson se të gjitha palët do të trajtohen me drejtësi dhe falënderon ndërmjetësit ndërkombëtarë që ndihmuan në arritjen e kësaj marrëveshjeje: Katarin, Egjiptin dhe Turqinë.
“Kjo është një DITË E MADHE për botën arabe dhe myslimane, për Izraelin, për të gjitha kombet përreth dhe për Shtetet e Bashkuara të Amerikës,” shkruan ai, duke përmbyllur mesazhin me një thirrje simbolike: “TË BEKUAR QOFSHIN PAQEBËRËSIT!”
Deklarata vjen në një moment të ndjeshëm për Lindjen e Mesme, ndërsa sytë e botës janë drejtuar nga zhvillimet mes Izraelit dhe Hamasit.
