Presidenti i Shteteve të Bashkuara, Donald Trump, ka reaguar me tone të ashpra pas vrasjes së politikanit dhe aktivistit konservator Charlie Kirk, duke e cilësuar ngjarjen si një akt brutal që kërcënon stabilitetin demokratik të vendit.
Në një mesazh video të publikuar në rrjetet sociale, Trump u shpreh i vendosur se autorët dhe mbështetësit e tyre do të përballen me drejtësinë. “Administrata ime do të ndjekë penalisht jo vetëm autorët e kësaj mizorie, por edhe ata që i financojnë dhe i nxisin. Kjo përfshin organizata që promovojnë dhunë politike dhe urrejtje kundër konservatorëve,” tha ai.
Presidenti vlerësoi Charlie Kirkin si një “patriot të palëkundur” dhe paralajmëroi se Amerika po kalon një moment tejet të rrezikshëm. “Kemi hyrë në një periudhë të errët. Kjo nuk është më thjesht politikë, është një luftë për vetë shpirtin e kombit tonë,” deklaroi ai.
Ngjarja tragjike ndodhi në ambientet e Universitetit të Luginës së Utah-ut, ku Kirk ishte i ftuar në një aktivitet publik. Hetimet për vrasjen vijojnë, ndërsa tensionet janë rritur në disa qytete të SHBA-së, ku janë shënuar protesta dhe përplasje mes grupeve politike kundërshtare.
Shtëpia e Bardhë ka bërë thirrje për qetësi, por paralajmëroi se do të veprojë me forcë ndaj çdo forme ekstremizmi politik që kërcënon sigurinë kombëtare.
