Pavarësisht deklaratave optimiste të Donald Trump, i cili ka shprehur besimin se një marrëveshje për armëpushim në Rripin e Gazës mund të arrihet brenda javës, zhvillimet e fundit në terren flasin ndryshe. Një zyrtar i lartë izraelit, në një reagim të drejtpërdrejtë, ka hedhur poshtë zërat për përparim konkret në negociatat me Hamasin.
Sipas tij, pozicionet e të dyja palëve mbeten të pandryshuara, sidomos mbi çështjet thelbësore që kanë bllokuar marrëveshjen, si kërkesa e Hamasit për garanci të qarta që lufta në Gaza do të përfundojë.
Ndërkohë, burime nga mediat izraelite raportojnë se kryeministri Benjamin Netanyahu pritet të zhvillojë nesër një raund të ri konsultimesh me zyrtarët më të lartë të sigurisë për të vlerësuar nëse ka hapësirë për të çuar përpara bisedimet mbi lirimin e pengjeve dhe një armëpushim të mundshëm.
Nga të njëjtat burime thuhet se Izraeli ka shfaqur njëfarë gatishmërie për kompromis në kontaktet e fundit indirekte, por palës izraelite i mungon ende një sinjal i qartë fleksibiliteti nga Hamasi.
