Një ngjarje e rëndë ka ndodhur mëngjesin e sotëm në Kosovë, ku Policia e Kosovës është sulmuar me arsenal armësh, përfshirë këtu edhe me granata dore, ku për pasojë një polic ka mbetur i vrarë dhe një tjetër është plagosur.
Sulmet ndaj policisë kanë ndodhur në orët e hershme të mëngjesit, rreth orës 03:00 në fshatin Bajnskë të Leposaviçit.
“Gjatë realizimit të detyrave policore, sot rreth orës 02:34 në Mitrovicë Veri, njësia për ndërhyrje të shpejtë e policisë kufitare ka vërejtur se në hyrje të fshatit Bajnskë, në urë janë vendosur dy mjetet të rënda kamion (pa targa) dhe hyrja në këtë fshat përmes urës nuk mund të bëhet, pasi e njëjta është bllokuar. Njësitë e rendit të Stacionit Policor Zveqan, pas pranimit të informacionit i janë përgjigjur rastit dhe janë nisur me tri njësi në drejtim të lokacionit dhe posa kanë mbërri në afërsi të vendit ku është raportuar bllokada, njësitë policore kanë hasur në rezistencë ku nga disa pozicione të ndryshme janë gjuajtur me arsenal armësh të zjarrit, përfshirë këtu edhe me granata dore dhe zollë, ku si pasojë e gjuajtjeve janë qëlluar me armë zjarri dy zyrtarë policorë”, njoftoi Policia.
Ngjarja ka ngjallur shumë reagime nga zyrtarët e vendit, të cilët ndër të tjera shprehen se ky është një sulm terrorist i organizuar nga serbët. Sakaq, presidentja Vjosa Osmani ka anuluar edhe një takim zyrtar që ishteplanifikuar të mbahej sot, për shkak të ngjarjes tronditëse.
