Shefi i njohur amerikan, Anthony Bourdain, që mbajti mbërthyer pas ekranit shikuesit e “CNN” në mbarë botën, është ndarë nga jeta në moshën 61-vjeçare.
CNN konfirmoi lajmin tragjik të premten duke theksuar se Bourdain u vetëvra në dhomën e hotelit.
“Me trishtim të jashtëzakonshëm, ne konfirmojmë vdekjen e mikut dhe kolegut tonë, Anthony Bourdain”, tha gjiganti mediatik në një deklaratë të premten në mëngjes.
“Dashuria e tij për aventura të mëdha, miqtë e rinj, ushqimin dhe pijet dhe historitë e shquara të botës, e bënë atë një narrator unik. Talentet e tij kurrë nuk pushuan së na mahnituri dhe ne do të na mungojë shumë. Lutjet tona janë me vajzën e tij dhe familjen në këtë kohë jashtëzakonisht të vështirë”.
Bourdain ishte në Francë duke punuar për një episod të ardhshëm të serialit të tij të çmuar për “CNN”, “Parts Unknown”.
Ai u gjet i pajetë nga miku i tij i ngushtë, Eric Ripert, kuzhinier francez, në dhomën e tij të hotelit të premten në mëngjes.
Bourdain ishte mjeshtër i zanatit të tij – së pari në kuzhinë dhe pastaj në media, shkruan CNN. Nëpërmjet emisioneve televizive dhe librave të tij, ai zbuloi gjendjen njerëzore dhe ndihmoi audiencat të mendonin ndryshe për ushqimin, udhëtimin dhe veten e tyre. Ai bëri fushatë për kushte më të sigurta të punës për stafin e restoranteve.
/CNN
