Modelja e njohur braziliane, Luciana Curtis, dhe familja e saj janë bërë viktima të një rrëmbimi dramatik në Brazil.
Ngjarja ndodhi të mërkurën pas një darke në restorant, kur një grup kriminal i maskuar i detyroi ata, me armë në dorë, të hipnin në makinë dhe i çuan në një kasolle të braktisur në periferi të qytetit.
Familja e Curtis u mbajt peng gjatë natës, ndërsa banda kërkoi një shpërblim prej 31 mijë eurosh për t’i lënë të lirë. Pas realizimit të pagesës, ata u liruan dhe u kthyen në siguri. Të afërmit e modeles thanë se, megjithëse janë mirë fizikisht, ngjarja ka lënë një ndikim të thellë emocional, veçanërisht për Lucianën.
Luciana Curtis, e lindur në Sao Paulo, është një figurë e njohur në industrinë e modelimit. Pas fillimeve të saj si adoleshente, ajo fitoi famë ndërkombëtare në vitin 1993, kur mori titullin “Supermodel of the World” në Brazil. Gjatë karrierës së saj, ka pozuar për revista prestigjoze si Glamour, Cosmopolitan dhe Marie Claire, dhe ka bashkëpunuar me marka të njohura ndërkombëtare si Victoria’s Secret, H&M dhe L’Oreal.
