Pas një hetimi të thelluar, Prokuroria pranë Gjykatës së Shkallës së Parë të Fierit ka regjistruar procedim penal për tre persona lidhur me ngjarjen e rëndë që ndodhi më 23 korrik 2025 në fshatin Frashër. Të dyshuarit janë akuzuar për “Vrasje për shkak të marrëdhënieve familjare”, e kryer në bashkëpunim, dhe për “Veprime që pengojnë zbulimin e së vërtetës”.
Në orën 21:16 të asaj dite, një telefonatë nga Sallën Operative në Fier raportoi për një incident në banesën e shtetasit Anesti Rama. Në vendngjarje, ambulanca e gjeti atë të shtrirë dhe pa shenja jete në sallonin e shtëpisë. Fillimisht, vajza dhe bashkëshortja e të ndjerit thanë se ai ishte rrëzuar aksidentalisht në banjë, duke pastruar më pas trupin dhe përgatitur ceremoninë mortore.
Megjithatë, ekzaminimet e trupit zbuluan dëmtime të dukshme në kokë dhe fytyrë, duke ngritur dyshime për një vdekje të dhunshme. Pas hetimeve të thelluara, u arrestua vajza e viktimës, Emanilda Rama, si e dyshuar për vrasje në bashkëpunim, ndërsa bashkëshortja e viktimës, Valbona Rama, u arrestua për pengim të hetimeve. Po ashtu, një tjetër person, Çlirim Dogani, u ndalua pasi u zbulua lidhja e tij me vajzën e viktimës.
Prokuroria ka kërkuar që të tre të dyshuarit të qëndrojnë në burg, kërkesë që u miratua nga Gjykata e Fierit. Hetimet për zbardhjen e motivit dhe detajeve të ngjarjes vijojnë.
