4 adoleshente (dy binjakë 16-vjeçarë dhe dy të rinj të tjerë të moshës 17-vjeçare) zgjodhën rubrikën e “Ka një mesazh për ty” për të thirrur mamatë e tyre, pasi kishin një kërkesë të pafajshme. Ata kërkonin të bindnin nënat e tyre që t’i linin të flinin tek shoqet dhe shokët, ose siç njihet ndryshe si “sleep over”.
“Problemi është që mami nuk më le të iki të flej tek shtëpitë e shoqeve dhe kam vënë është që është një problem që e kanë të gjithë. Mendoj që është më shumë çështja e merakut. Meraku i mamit tim është se çfarë mund të bëj unë tek shtëpia e një shoqeje”, shpjegoi Alensa.
Mamatë e katër të rinjve nuk e njihnin njëra-tjetrën dhe u ftuan në të njëjtën kohë në studion e “E Diela Shqiptare”. Të gjendura përballë njëra-tjetrës, tre nënat u përpoqën të gjenin se çfarë i lidhte bashkë, por qe e pamundur.
“Do kemi ardhur gabimisht”, shpreheshin ato duke qeshur.
Dhe enigma mori fund, kur në ekran u shfaqën fëmijët e tyre, të cilët në një klasë, u kërkuan nënave që t’i mirëkuptonin dhe t’i jepnin pak liri. Por mendimi i tre nënave në studio, nuk ndryshoi aspak.
“Rejdi e di shumë mirë që unë i kam dhënë shumë besim, më shumë seç duhet. Unë kam vetëm një merak. Duke jetuar në këtë kohë që fëmijët tanë përballen me gjërat nga më të ndryshmet, prindi është përgjegjës për çdo gjë. Nuk mund të lejojmë që ne prindërit t’i japim liri të pakufizuar”. – tha nëna e Redit.
“Ata janë gjithë kohës me shokët dhe shoqet, gjumë për gjumë, secili në shtëpinë e vet them unë”. – tha nëna e binjakëve.
