Tre ditë pas ndarjes nga jeta të DJ-it me famë botërore, Avicii, ka reaguar familja e tij duke falënderuar të gjithë fansat për suportin që iu kanë dhënë në këto ditë të vështira.
Avicii, emri i vërtetë i të cilit është Tim Bergling, ndërroi jetë ditën e premte në moshën 28-vjeçare, ndërsa ishe me pushime në Oman.
Pas lajmit të trishtuar të vdekjes së tij më 20 prill, gjithë bota ka derdhur lot për të dhe në koncerte të ndryshme, sikurse ishte dhe ai i Coachhella-s, u luajtën hitet e tij muzikore.
Në deklaratën e saj, familja e tij falënderoi të gjithë miqtë dhe fansat e tij për nderimin që i kishin bërë muzikantit suedez dhe kërkuan që respektimi i privatësisë së tij të ruhet në mes të kësaj kohe të vështirë për ta.
“Dëshirojmë t’ju falënderojmë për mbështetjen dhe fjalët e dashura për birin dhe vëllain tonë. Ne jemi kaq mirënjohës për të gjithë ata që e donin muzikën e Tim dhe kanë kujtime të çmuara të këngëve të tij. Faleminderit për të gjitha nismat e ndërmarra për të nderuar Timin, me tubime publike, këmbanat e kishave që kanë rënë nën ritmin e melodive të tij … dhe momentet e heshtjes në mbarë botën.”, shkruhej në deklaratën e familjarëve të Avicii-t, të cilët ndihen shumë mirënjohës në respektimin e privatësisë që iu është bërë deri më tani dhe shprehin dëshirën që kjo gjë të vazhdojë edhe më pas.
Shkaku i vdekjes së Avicii-it ende nuk është zbuluar, por policia konfirmoi gjatë fundjavës që lamë pas se nga rezultatet e autopsisë rezulton se nuk bëhet fjalë për një vrasje.
Burimi: Daily Mail
