Një ngjarje e rëndë tronditi mbarë opinionin mbrëmjen e djeshme, pasi një burrë i mori jetën ish-bashkëshortes dhe vajzës 9 vjeç. Pjetër Ndrecaj kishte shkuar në shtëpinë e ish-gruas dhe pas një konflikti e kishte qëlluar për vdekje nënën e 5 fëmijëve dhe të voglën e familjes.
“Indeksonline” raporton se debatet mes çiftit kishin nisur në muajin maj, kur ishin shfaqur edhe momentet e para të dhunës nga autori i krimit. Mësohet se ai kishte dhunuar barbarisht Valbonën dhe kjo e fundit e kishte denoncuar menjëherë pas lëndimeve që mori në kokë dhe në syrin e maj. Pas arrestimit, ai ka qëndruar deri më 11 qershor në paraburgim e më pas është lënë i lirë.
Viktima Valbona 40 vjeç kishte rrëfyer në Prokurori se debati në familje kishte nisur pasi djali i saj kishte gjetur 5 euro në rrugë, ndërsa djali i kunatit kishte pretenduar se ishin të tijat gjë që kishte çuar në një konflikt në mes kunatave. Burri të nesërmen i kishte dhënë djalit të vëllait paratë.
Valbona ishte ndjerë e ofenduar nga ky veprim dhe debati mes tyre kishte përfunduar në dhunë fizike. Ndër të tjera ajo ishte shprehur se kishte kryer edhe marrëdhënie seksuale pa dëshirën e saj, me të shoqin.
Ndërkohë për shkak të këtij konflikti marrëdhëniet e tyre s’kanë qenë aspak të mira dhe 40- vjeçari e ka kërcënuar disa herë më parë Valbonën deri sa mbrëmjen e djeshme i shkoi në shtëpi dhe e ekzekutoi atë dhe të bijën.
