Një mëngjes i zakonshëm shndërrohet në një tragjedi të pariparueshme në Precenicco, provincë e Udines në Itali, ku një vajzë 17-vjeçare, Alice Morsanutto, humbi jetën në rrethana tragjike teksa nisej drejt shkollës.
Ngjarja ndodhi rreth orës 06:30 të mëngjesit të së enjtes, vetëm 200 metra nga shtëpia e saj. Alice po kalonte rrugën pranë vijave të bardha, kur një makinë që drejtohej nga një i ri e goditi për vdekje. Shoferi ndaloi menjëherë dhe lajmëroi urgjencën. Në vendngjarje mbërritën shpejt ambulanca, zjarrfikësit dhe një helikopter mjekësor, por përpjekjet për ta shpëtuar vajzën rezultuan të kota.
Prindërit e Alices, të alarmuar nga sirenat, zbritën menjëherë në rrugë. I ati u përball me pamjen shkatërruese të së bijës së shtrirë në asfalt. Një detaj edhe më i dhimbshëm: vëllai binjak i Alices kishte kaluar të njëjtën rrugë vetëm pak minuta më parë, duke marrë autobusin drejt shkollës, pa e ditur tragjedinë që do të ndodhte pas tij.
Alice ishte nxënëse në liceun artistik “Sello” në Udine dhe njihej si një vajzë e qetë, e dashur dhe shumë e përkushtuar në mësime.
Karabinierët po hetojnë për të zbuluar saktësisht dinamikën e aksidentit, ndërsa komuniteti është tronditur nga humbja e një jete të re, në rrethana aq të padrejta.
