Një 4-vjeçar ndërroi jetë sot në mënyrë tragjike pasi u mbyt në një pishinë në Golem.
I vogli i kishte shpëtuar vëmendjes së gjyshes së tij, e cila e kishte marrë me vete në hotel. Ajo ishte ngjitur në katin e dytë të hotelit, për të lënë një porosi, kur vogëlushi ishte afruar pranë pishinës.
I mituri u gjend nga punonjësi i vilës, Idai Zaka, i cili e nxori vogëlushin nga pishina por shumë vonë. Ai tregon për “Balkanweb” se u përpoq t’i jepte ndihmën e shpejtë por më kot.
I pyetur nga gazetari, Zaka tha se i mituri M.Xh nuk kishte shenja jete kur u nxor nga pishina. Trupi i vogëlushit, i cili ishte djalë i vetëm, është dërguar për ekspertizë mjeko-ligjore.
Prindërit janë tronditur nga ngjarja tragjike, ndërsa spitali ka kërkuar ndihmën e një psikologeje për t’u ardhur në ndihmë.
