Mesditën e djeshme në afërsi të qytetit verior të Xhenovas në Itali u shemb ura “Morandi”, rreth 100 metra e lartë, duke lënë pas shumë viktima.
Mbrëmjen e djeshme u përfol se ishin gjetur gati 35 viktima dhe 10 persona të tjerë ishin shpallur të humbur, mes të cilëve edhe fëmijë. Ndërsa mëngjesin e sotëm Ministria e Brendshme në Itali deklaroi se pas punës së vazhdueshme të zjarrfikësve numri i viktimave ka shkuar në 38-të, tre prej të cilëve janë fëmijë, një djalë 8-vjeçar dhe dy adoleshentë të moshës 12 dhe 13 vjeç.
Mes viktimave është bërë e ditur se është edhe një shqiptar. “Balkanweb” ka komunikuar me familjarët e viktimës dhe ka mësuar se ai është 22-vjeçari Marjus Djerri nga Shijaku.
Sipas familjarëve të tij, i riu ishte duke shkuar për në punë në momentin që ura është shembur.
Mirëpo i zhdukur u shpall edhe një shqiptar tjetër, i cili udhëtonte së bashku me Marjusin dhe madje një i afërm i tij publikoi lajmin e ndarjes nga jeta të të riut ende pa u konfirmuar nga autoritetet italiane.
Vetëm pak minuta më parë u konfimua zyrtarisht se ishte gjetur i vdekur edhe Edi Bokrina, i cli po udhëtonte së bashku me Marjusin në autostradën A10 me një furgon në drejtim të Rapallos ku punonin në një kompani pastrimi.
Burimi Balkanweb
