Të paktën 1000 persona kanë humbur jetën në Sudan si pasojë e një rrëshqitjeje të rëndë dheu që goditi fshatin Tarasin, në rajonin malor të Marras në Darfurin Qendror. Sipas autoriteteve lokale, vetëm një person ka mbijetuar nga ngjarja e rëndë dhe tragjike që ndodhi pas shirave të rrëmbyeshëm në zonë.
Rrëshqitja e dheut shkatërroi thuajse të gjithë fshatin, ku shumë banorë ishin strehuar pasi ishin detyruar të largoheshin nga shtëpitë e tyre për shkak të luftës civile që ka përfshirë vendin prej vitit 2023.
Ushtria Çlirimtare e Sudanit ka kërkuar ndihmë emergjente nga Kombet e Bashkuara dhe organizata të tjera ndërkombëtare, duke e përshkruar situatën si një katastrofë humanitare. Guvernatori i Darfurit, Minni Minnawi, e quajti këtë një ngjarje tragjike dhe apeloi për mbështetje ndërkombëtare.
Sudani vijon të përballet me pasojat e një lufte civile shkatërrimtare mes ushtrisë dhe Forcave të Mbështetjes së Shpejtë (RSF), konflikt që ka shkaktuar uri masive dhe zhvendosjen e rreth 12 milionë personave.
Ndërkohë, vlerësimet për numrin e viktimave të luftës variojnë, por sipas burimeve amerikane, deri në 150,000 persona mund të kenë humbur jetën që prej fillimit të armiqësive. Organizatat humanitare kanë paralajmëruarse situata mund të përkeqësohet nëse nuk ka një ndërhyrje të menjëhershme ndërkombëtare.
