Presidenti Donald Trump ka vendosur pezullimin e skemës së lotarisë së Kartës së Gjelbër (DV1) pas të shtënave të ndodhura në Universitetin Brown, ku humbën jetën dy persona. I dyshuari për sulmin, portugezi Claudio Neves Valente, i cili u gjet më vonë i vdekur, kishte hyrë në SHBA në vitin 2017 përmes programit të vizave të emigrantit.
Sekretarja e Sigurisë Kombëtare, Kristi Noem, tha se pezullimi i programit synon të “sigurojë që asnjë amerikan të mos dëmtohet nga ky program katastrofik”. Sipas zyrtarëve amerikanë, 48-vjeçari Neves Valente besohet se ka vrarë më parë profesorin portugez Nuno Loureiro të Institutit të Teknologjisë të Masaçusetsit.
Skema DV1 ofron deri në 50,000 viza çdo vit përmes një procesi përzgjedhjeje rastësore për shtetasit e vendeve me emigracion të ulët drejt SHBA-së. Noem theksoi se Trump kishte tentuar ta ndalonte këtë program edhe në vitin 2017, pas një sulmi me kamion në New York City, ku mbetën të vrarë tetë persona. Në atë rast, shtetasi uzbek Sayfullo Saipov, mbështetës i Shtetit Islamik, kishte hyrë në SHBA përmes të njëjtit program.
Pas një hetimi gjashtëditor që përfshiu shumë shtete, Neves Valente u gjet i vdekur në Salem, New Hampshire, në një depo, në atë që policia e konsideron vetëvrasje. Në vendngjarje u gjetën dy armë zjarri dhe prova që përputheshin me sulmin në Universitetin Brown.
Skema e Kartës së Gjelbër mbetet pezull, ndërsa zyrtarët amerikanë shqyrtojnë masa shtesë për të parandaluar rreziqe të ngjashme në të ardhmen.
