Një ngjarje e rëndë është regjistruar mëngjesin e sotëm në fshatin Velçan të Pogradecit, ku një 47-vjeçar ka humbur jetën pasi dyshohet se është goditur nga rrufeja.
Sipas informacioneve paraprake të policisë, ngjarja ndodhi rreth orës 10:00, teksa viktima, identifikuar me inicialet L. Ç., po ruante bagëtitë në një zonë të hapur.
Tragjedia nuk ka prekur vetëm jetën e tij, nga goditja e rrufesë kanë ngordhur edhe rreth 20 bagëti të imëta që ndodheshin pranë tij.
“Rreth orës 10:00, dyshohet se si pasojë e goditjes nga rrufeja, gjatë kohës që ruante bagëtitë në fshatin Velçan, ka humbur jetën shtetasi L. Ç., 47 vjeç (çoban). Gjithashtu, si pasojë kanë ngordhur rreth 20 krerë bagëti të imëta”, njofton policia.
Në vendngjarje ndodhet grupi hetimor, i cili po punon për zbardhjen e plotë të rrethanave të kësaj ngjarjeje tragjike.
