Një ngjarje e rëndë tronditi të shtunën qytetin Bautzen të Gjermanisë, ku një akrobate spanjolle humbi jetën gjatë një performance në një cirk. Marina B., 27 vjeçe nga Mallorca e Spanjës, u rrëzua nga lartësia prej pesë metrash ndërsa performonte vetëm në trapez, përpara rreth 100 spektatorëve, mes tyre shumë fëmijë.
Ngjarja ndodhi rreth orës 17:45 në çadrën e Circus Paul Busch. Dëshmitarët thanë se momenti ishte tronditës: publiku shpërtheu në britma dhe shumë prindër u përpoqën të mbronin fëmijët e tyre nga pamjet e rënda.
Stafi i cirkut dhe shërbimet emergjente ndërhynë menjëherë, por Marina ndërroi jetë në vendin e ngjarjes si pasojë e plagëve të rënda.
Sipas policisë gjermane, artistja nuk kishte përdorur litar sigurie, por kjo nuk përbënte shkelje, pasi përdorimi i tij nuk është i detyrueshëm për performancat solo. “Ajo vetë merrte vendimin për sigurinë”, tha zëdhënësi Stefan Heiduck.
Circus Paul Busch anuloi të gjitha shfaqjet e ardhshme dhe në sportelin e biletave u vendos një njoftim ku lexohej: “Për shkak të një humbjeje, cirku do të qëndrojë i mbyllur.”
Marina kishte mbi 10 vite përvojë dhe ishte shumë e apasionuar pas akrobacisë. Në një postim të fundit në rrjetet sociale, ajo kishte shkruar: “Lart, unë punoj më mirë.”
Ngjarja la pas një komunitet të tronditur dhe një industrinë e cirkut në zi.
