Katër persona kanë humbur jetën pranë bregut verior të Francës, pasi u përpoqën të kalonin Kanalin e Anglisë me një varkë të vogël, në një tjetër ngjarje tragjike që lidhet me emigracionin drejt Mbretërisë së Bashkuar. Lajmi është konfirmuar nga autoritetet lokale franceze, të cilat kanë bërë të ditur se operacionet e shpëtimit vijojnë ende.
Sipas mediave vendase, rreth 30 persona të tjerë janë marrë në kujdes nga shërbimet e emergjencës, ndërsa në vendngjarje kanë mbërritur ekipe zjarrfikëse dhe njësi të specializuara të kujdesit intensiv rreth orës 07:30 sipas orës lokale. Gjendja e disa prej të mbijetuarve raportohet të jetë e rënduar, ndërkohë që autoritetet po punojnë për të stabilizuar situatën.
Deri në këto momente, nuk dihet ende shtetësia e viktimave dhe e personave të përfshirë në këtë tentativë kalimi, as numri i saktë i personave që ndodheshin në bordin e mjetit lundrues. Hetimet janë në vijim për të zbardhur rrethanat e plota të ngjarjes.
Kjo tragjedi vjen pas një periudhe me mot të paqëndrueshëm në Kanalin e Anglisë, ndërsa ditët e fundit kushtet atmosferike janë përmirësuar, duke sjellë edhe rritje të tentativave për kalime me varka të vogla. Statistikat tregojnë se gjatë vitit 2025, mbi 41 mijë persona arritën në Mbretërinë e Bashkuar nga Franca përmes kësaj rruge, ndërsa vetëm në tre muajt e parë të vitit 2026 janë regjistruar mbi 4 mijë kalime.
Ngjarje të tilla vijojnë të ngrenë shqetësime mbi rrezikun e lartë që mbartin këto udhëtime dhe sfidat e vazhdueshme të krizës migratore në rajon.
