Një humbje e madhe për futbollin turk dhe komunitetin sportiv në Stamboll! Mbrojtësi 20-vjeçar i klubit İstanbulspor, Baran Alp Vardar, ka ndërruar jetë pas një beteje me kancerin. Lajmi u konfirmua nga klubi i cili përmes rrjeteve sociale shprehu dhimbjen e thellë për humbjen e lojtarit të tij të dashur.
“Jemi në dhimbje të madhe dhe pikëllim të thellë… Baran Alp, që gjithmonë do të kujtohet për karakterin e tij, përkushtimin ndaj shokëve të skuadrës dhe natyrën e gëzuar, do të jetojë përgjithmonë në zemrat tona,” shkruante klubi, duke i dhënë ngushëllime familjes, miqve dhe komunitetit të futbollit.
View this post on Instagram
Varrimi i Vardar-it u zhvillua në Xhaminë Mevlana në distriktin Beylikdüzü të Stambollit, ku klubi publikoi foto nga ceremonia me një emoji zemre të zezë dhe shkrimin: “I japim lamtumirën e fundit të dashurit tonë Baran Alp.”
Lojtari i lindur në distriktin Eminönü të Stambollit kishte filluar karrierën e tij në vitin 2015 dhe kishte luajtur për katër klube të ndryshme deri në momentin e vdekjes. Ai bëri tre paraqitje për İstanbulspor në sezonin 2023/24 të Ligës Super të Turqisë para se të sëmurej.
Përmes mesazheve të tyre, klubet dhe komuniteti sportiv kanë shprehur dhimbjen dhe lutjet për shpirtin e tij, duke e përkujtuar Baran Alpin si një futbollist të përkushtuar dhe një djalë me zemër të madhe, i cili do të mungojë shumë.
