Një ngjarje tragjike ka tronditur botën e futbollit në Ekuador. Miguel Nazareno, një futbollist adoleshent vetëm 16 vjeç, ka humbur jetën pasi u godit nga një plumb i që e kapi rastësisht ndërsa ndodhej në banesën e tij në Guayaquil, njoftoi policia më 5 nëntor.
Sipas raportimeve të Associated Press, incidenti ndodhi në rrethana ende të paqarta. Nazareno ishte pjesë e ekipit të të rinjve të Independiente del Valle, një nga akademitë më të njohura të futbollit në vend. Pas lajmit të ndarjes së tij nga jeta, klubi publikoi një mesazh prekës në Instagram, duke e cilësuar humbjen e tij si pasojë të “pasigurisë që po prek vendin tonë.”
“Familja e Independiente del Valle shpreh hidhërimin e thellë për ndarjen e parakohshme nga jeta të Miguel Nazareno, lojtarit të ekipit tonë të Independiente Juniors. Kujtimi yt do të mbetet gjithmonë në zemrat tona,” shkroi klubi.
Nazareno luante si mesfushor dhe sulmues, dhe konsiderohej një talent premtues për të ardhmen e futbollit ekuadorian.
Sipas mediave lokale, ai është futbollisti i katërt që humb jetën në rrethana të ngjashme gjatë vitit 2025, në një valë të dhunës me armë që ka prekur vendin. Më herët, futbollistët Maicol Valencia, Leandro Yépez dhe Jonathan González janë vrarë gjithashtu në incidente të ndara.
Ngjarja ka shkaktuar indinjatë të madhe në opinionin publik dhe ka ringjallur thirrjet për më shumë siguri në komunitetet lokale të Guayaquil, qytet që prej kohësh përballet me rritje të krimeve të armatosura.
