Një ngjarje tragjike është regjistruar pasditen e kësaj të premteje në Durrës, ku një adoleshent 17-vjeçar ka humbur jetën në ambientet e një shkolle të mesme, duke tronditur komunitetin dhe bashkëmoshatarët e tij.
Sipas informacioneve paraprake, ngjarja ka ndodhur rreth orës 15:15 në palestrën e shkollës “Marie Kaçulini”, e cila aktualisht përdoret për zhvillimin e mësimit nga gjimnazi publik “Gjergj Kastrioti”, për shkak të dëmtimeve që ky i fundit pësoi nga tërmeti dhe rindërtimit që vijon ende.
Burime zyrtare bëjnë me dije se 17-vjeçari, ndërsa ndodhej në ambientet e palestrës, është ndjerë papritur keq dhe ka humbur ndjenjat. Menjëherë pas incidentit është njoftuar shërbimi i urgjencës, ndërsa i riu është transportuar me autoambulancë drejt spitalit më të afërt. Pavarësisht ndërhyrjes së mjekëve, ai nuk ka arritur të mbijetojë.
Dyshimet e para lidhen me shkaqe natyrale, ku sipas burimeve paraprake, mendohet se i mituri mund të ketë pësuar një arrest kardiak. Megjithatë, pritet që ekspertiza mjeko-ligjore të përcaktojë me saktësi shkakun e vdekjes.
Në vendngjarje kanë mbërritur menjëherë shërbimet e Policisë së Durrësit, të cilat, në bashkëpunim me grupin hetimor, po kryejnë të gjitha veprimet procedurale për zbardhjen e plotë të rrethanave të kësaj ngjarjeje të rëndë.
Ngjarja ka shkaktuar tronditje të madhe tek nxënësit, stafi pedagogjik dhe familjarët e të ndjerit, ndërsa autoritetet vijojnë hetimet për të hedhur dritë mbi çdo detaj.
