Tre punëtorë të minierës “Balgjaj” në Dibër kanë humbur kontaktet me familjen e tyre mbrëmjen e djeshme, pasi kanë mbetur të bllokuar brenda galerisë. Policia njoftoi se në orën 18:15, është njoftuar nga familja e inxhinierit që nuk kishte kontaktuar me familjen prej orësh të tëra, dhe kanë nisur kërkimet.
Pas më shumë se pesë orësh kërkime, grupet e avari-shpëtimit kanë krijuar kontakt me një prej minatorëve, por fatkeqësisht, kishte ndërruar jetë. Pas tij kanë ndërruar jetë edhe dy të tjerët.
Pas 48 orësh tre trupat e pajetë janë nxjerrë nga miniera e Selishtës. Ka qenë vëllai i njërit prej tyre që ka shkuar në polici dhe ka bërë denoncimin, duke alarmuar dhe banorët e zonës, të cilët kanë shkuar te miniera ku ata punonin.
Sipas “BalkanWeb”, të pajetë nga miniera janë nxjerrë inxhinieri Ismail Hoxha, 62 vjeç, si dhe Fatos Cesku, 55 vjeç, dhe Rruzhdi Rushiti, 29 vjeç.
Njoftimi i policisë:
Në vijim të informacionit të dhënë, ku tre shtetas që punonin në minierën e “Balgjaj”, Selishtë, kishin humbur kontaktet me familjen, ju informojmë se rreth orës 03:00 datë 29.10 2020 në thellësi të minierës në Selishtë, nga ana e grupit avari- shpëtimit, u gjetën trupat e pajetë të shtetasve, I. H., 64 vjeç, banues në Peshkopi,
F. Ç., 55 vjeç, banues në Bulqizë dhe R. R., 33 vjeç, banues në Bulqizë.Nga veprimet hetimore të kryera dyshohet se kanë humbur jetën si pasojë e asfiksisë nga gazrat e minierës.
Vijon puna për sqarimin e plotë të rrethanave të ngjarjes.
