Një ngjarje e rëndë ka tronditur New York City, ku një foshnjë vetëm 7 muajshe humbi jetën pasi u qëllua në kokë nga një plumb ‘qorr’, ndërsa ndodhej në karrocën e saj brenda një dyqani ushqimesh në lagjen Brooklyn.
Nëna e vogëlushes, Liana Charles Moore, ishte aty së bashku me partnerin dhe dy fëmijët e vegjël. Fillimisht, familja mendoi se zhurmat ishin fishekzjarre, por realiteti u bë tragjik kur plumbat thyen xhamat e dyqanit. Moore përshkroi tmerrin kur pa vajzën e saj, Kaori, të qëlluar në kokë. Pavarësisht përpjekjeve për ta mbajtur gjallë, plagët rezultuan fatale dhe foshnja vdiq në spital.
Ngjarja la pas edhe plagosjen e lehtë të vëllait dyvjeçar të Kaorit, i cili u transportua gjithashtu për trajtim mjekësor. Nëna e shkatërruar rrëfeu për mediat se Kaori sapo kishte filluar të shqiptonte fjalën “mama” dhe e përshkroi si një fëmijë të pafajshëm që nuk meritonte një fat të tillë.
Policia ka arrestuar një person në lidhje me të shtënat, ndërsa është në kërkim të një të dyti. Autoritetet publikuan pamje nga kamerat e sigurisë, ku dyshohet se autorët ishin përfshirë në një aksident me motoçikletë vetëm disa blloqe larg vendit të ngjarjes.
Ngjarja ka shkaktuar tronditje të madhe në opinionin publik, ndërsa Moore kërkon drejtësi për vajzën e saj, duke theksuar se familja u gjend rastësisht në vendin e gabuar në momentin më tragjik të jetës së tyre.
