Një tragjedi e madhe ka ndodhur në Brazil, ku raportohet për më shumë se 32 viktima dhe dhjetëra të plagosur. Një autobus me 48 pasagjerë është përplasur me një kamion, i cili ka shpërthyer në flakë, duke shkaktuar viktima të shumta. Sipas raportimeve të mediave të huaja, më shumë se 32 persona kanë humbur jetën, ndërsa ende nuk është përcaktuar numri i saktë për shkak të dëmtimeve të rënda dhe trupave të djegur.
Incidenti ndodhi në orën 4:00 të mëngjesit, në një autostradë kryesore pranë qytetit të Teofilo Otoni, në shtetin Minas Gerais. Sipas shërbimit zjarrfikës, një gomë e autobusit shpërtheu, duke bërë që shoferi të humbiste kontrollin dhe të përplastej me kamionin që transportonte pllaka. Shpërthimi ka bërë që autobusi të marrë flakë, dhe ndërkohë që zjarrfikësit shpëtuan disa pasagjerë, shumë trupa ende nuk janë nxjerrë.
Një tjetër version i mundshëm i ngjarjes, i paraqitur nga dëshmitarët okularë, sugjeron se një copë e madhe graniti ra nga kamioni dhe shkaktoi përplasjen.
Autobusi ishte nisur nga Sao Paulo dhe po udhëtonte për në shtetin Bahia. Mes viktimave është shoferi i autobusit dhe të paktën një fëmijë. Autoritetet po hetojnë shkaqet e aksidentit dhe po mbledhin dëshmi nga dëshmitarët okularë.
