Një alarm i madh për pinguinët perandorë vjen nga Antarktida, ku një proces jetik që zakonisht siguron mbijetesën e tyre po kthehet në kërcënim serioz. Shkencëtarët paralajmërojnë se ngrohja globale ka sjellë tkurrje rekord të akullit detar, duke vënë në rrezik ciklin jetik të këtyre zogjve të veçantë.
Çdo vit, pinguinët kalojnë 30-40 ditë në ndërrimin e puplave, një periudhë kur humbasin pendët e vjetra dhe rrisin të reja, rezistente ndaj ujit. Gjatë kësaj kohe ata nuk mund të futen në det, pasi do të vdisnin nga i ftohti. Për këtë, ata varen nga platforma të sigurta akulli detar.
Por të dhënat e viteve rë fundit tregojnë një zhvendosje dramatike. Akulli detar në Antarktidën Perëndimore, ku jeton rreth 30-40% e popullatës globale të pinguinëve, u tkurr nga 2.8 milionë km² në vetëm 1.79 milionë km² në vitin 2023. Si pasojë, shumë koloni mbetën pa vende të sigurta për ndërrimin e puplave.
Dr. Peter Fretwell nga British Antarctic Survey, që studion pinguinët prej 20 vitesh, tha se ai identifikoi vetëm 25 grupe të vogla, krahasuar me qindra që shiheshin më parë. “Ky ishte një moment ‘O Zot i madh’,” u shpreh Fretwell. Shkencëtarët dyshojnë se mijëra pinguinë mund të kenë ngordhur duke u detyruar të futen në ujë para se pendët e reja të ishin të gatshme, ndërsa të tjerë mund të jenë zhvendosur në Antarktidën Lindore, duke ndërprerë ciklin e shumimit.
Procesi i ndërrimit të puplave është jashtëzakonisht i lodhshëm: zogjtë humbasin deri në 50% të peshës trupore dhe janë të pambrojtur pa pendët e reja. Shkencëtarët paralajmërojnë se këto zhvillime mund të përshpejtojnë rënien drastike apo edhe zhdukjen e pinguinëve perandorë brenda dekadave të ardhshme, duke treguar se ndryshimet klimatike mund të sjellin kthesa dramatike dhe të papritura për specie të tëra.
