Bashkia e Tiranës ka organizuar një sërë aktivitetesh me rastin e 1 Qershorit, që fillojnë në orën 9 të mëngjesit, për të vijuar deri në orët e pasdites.
Festë do të ketë kudo duke filluarm me sheshin “Skënderbej”, bulevardin “Dëshmorët e Kombit”, sheshin “Nënë Tereza”, Kodrat e Liqenit Artificial, si dhe tek fushat multisportive, në rrugët e të cilave nuk do të lejohet qarkullimi i makinave.
Për të nxitur aftësitë kreative të fëmijëve, por edhe pasionet e tyre, vjen Cooking Zone, që u mundëson të vegjëlve të njihen me vlerat ushqyese të frutave dhe perimeve.
Po kështu, hapësirë do t’i kushtohet edhe aftësive sipërmarrëse të fëmijëve.
Për të gjithë fëmijët e apasionuar pas sporteve, Bashkia e Tiranës në kuadër të ditës së 1 Qershorit ka organizuar një sërë aktivitetesh sportive.
Padyshim, në këtë ditë të veçantë për fëmijët nuk mund të mungonin lojëra të ndryshme tradicionale, ku ndër të tjera të vegjlit do të mund të ngrenë balonat e tyre, një aktivitet shumë i dashur për ta.
Aktivitetet e 1 Qershorit përfshijnë edhe xhirot me biçikleta, ekspozitat e ndryshme, si dhe panairet me temë mjedisin.
/Ora News
