Një skenar për film thriller po zhvillohet në qytetin e Durrësit. Një fëmijë 3-vjeçar është deklaruar i humbur dhe ende nuk ka asnjë gjurmë të tij. Fëmija jetonte me mamanë tij, ndërsa babai i kishte ndërruar jetë një vit më parë në një aksident rrugor.
Fëmija kishte shkuar tek gjyshërit, prindërit e të atit, por prej 4 ditësh nuk gjendet. Kjo ka bërë që gruaja, Ille Gjuni, ta denoncojë në polici. Nëna ka shoqëruar gjyshin e fëmijës Rexhep Gunin 58 vjeç, i cili fillimisht ka pretenduar se fëmija ka shkuar tek të afërmit në Kukës, por nuk gjendet as atje në adresën e dhënë.
Mamaja thotë se ka 4 ditë që nuk di se ku e ka fëmijën.
“Dua djalin! Kam 4 ditë që nuk e shoh. Mos ma kanë çuar jashtë. Marrëdhënia me vjehrrin me vjehrrën nuk ka qenë mirë, që kur ka vdekur burri.Ai (Gjyshi) nuk tregon se ku është, thotë se nuk e di, gënjen. Unë jam nga Dibra, ata janë nga Kukësi, duan ta mbajnë ata djalin”-thotë mamaja me lot në sy për median.
Gjyshi nuk pranon të bashkëpunojë me policinë dhe vetëm ka heshtur, ndërkohë në kërkim është shpallur gjyshja e fëmijës 3-vjeçar.
Sipas asaj që raportohet në media, pas vdekjes së bashkëshortit marrëdhëniet e saj me vjehrrin dhe vjehrrën nuk kanë qenë të mira. Gruaja ishte larguar nga shtëpia e burrit dhe jetonte me të atin. Mes dy familjeve kishin nisur kontradikta pasi gjyshërit kërkonin që ta rrisnin ata të voglin, ndërsa mamaja tregon se kishte pranuar që ata ta mbanin disa orë në fundjavë.
Por, që nga ajo ditë, nuk ka asnjë shenjë të të voglit të saj.
