Një tentativë për vetëvrasje shokoi sot Hollywood-in.
Bateristi i grupit legjendar të rokut Guns N’ Roses, Steven Adler, theri dje veten me thikë në stomak, në shtëpinë e tij në Los Angeles.
Sipas burimeve për “TMZ” ishte një telefonatë nga shtëpia e muzikantit ajo që i shpëtoi jetën, duke thirrur urgjencën e cila mundi të çojë Adler-in në spital, ku ai gjendet tani jashtë rrezikut për jetën.
Steven Adler është i njohur për fansat e rokut, veçanërisht si pjestari i përjashtuar nga Guns N’ Roses në 1990-ën, prej problemeve të varësisë ndaj narkotikëve. Pas kësaj ai ra në depresion ndërsa varësia ndaj narkotikëve u thellua.
Megjithatë, ish- shokët e grupit tentuan ta bënin të ndihej më mirë, duke e vendosur emrin e tij krah emrave të tyre në Bulevardin e Famës në Rock n’ Roll në 2012-ën.
Adler është arrestuar disa herë për posedim të heroinës dhe LSD-së.
Jetën e gjatë, të vështirë në luftë me varësinë, ai u mundua ta përmblidhte në një libër me titull: “Oreksi im për shkatërrim: seks, drogëra dhe Guns N’ Roses”. Aty, ai tregoi sesi varësia e shkatërroi edhe financiarisht, ndërsa dështoi edhe martesën e tij të parë.
