Emri i aktores Elia Zaharia është në listën e aktorëve që ranë dakord për prishjen e Teatrit Kombëtar.
Por Zaharia ka pohuar për “Lapsi.al” se firma e saj është falsifikuar në letrën e 64 aktorëve që kërkonin shembjen e godinës dhe ngritjen e një teatri të ri.
Pas insistimit të gazetarit se nëse në vijim del një dokument ku duket firma e saj aktorja, është përgjigjur:
“Po të gjendet, e ka vënë dikush tjetër, unë nuk kam firmosur kurrë”.
“Unë e vërtetoj se nuk kam qenë fare në Shqipëri, kam qene me pushime” ka thënë aktorja.
Ky është rasti i dytë që aktorët denoncojnë falsifikimin e firmës.
Edhe aktorja Pavlina Mani dhe bashkëshorti i saj, Piro Mani, ishin pjesë e listës, edhe pse ata prej vitesh jetojnë në SHBA. Në një rrëfim për “GSH” aktorja e madhe ka thënë se firmat e tyre janë falsifikuar.
