Thellohet bilanci tragjik në numrin e viktimave, pas zjarrit masiv që ra në rajonin e Atikës në Athinë ku deri më tani kanë humbur jetën mbi 50 persona dhe mbi 1000 banesa janë djegur.
“BalkanWeb” raporton se në mesin e viktimave janë edhe 3 shqiptarë, vdekja e të cilëve është konfirmuar ndërsa dyshohet edhe për dy fëmijë shqiptarë, por nuk ka konfirmim zyrtar. Tre burrat shqiptarë që kanë humbur jetën ishin punësuar në një tavernë e cila është shkrumbuar nga zjarri.
Gjithashtu mësohet se janë djegur edhe disa shtëpi të shqiptarëve që jetojnë dhe punojnë në Greqi. Ende nuk ka konfirmim zyrtar nga autoritetet për shqiptarët që kanë humbur jetën, por pritet të bëhen publike në vijim.
Atika është një zonë ku jetojnë dhe punojnë shumë shqiptarë.
Pak më herët, një dëshmitar raportoi për Report TV se, mes të plagosurve tyre janë edhe 13 shqiptarë, ndërsa njëri dyshohet se ka humbur jetën pasi u gjet i bllokuar në automjetin e tij.
