“Në Britani, një në dhjetë të burgosur të huaj është shqiptar”, kështu e ka nisur shkrimin dedikuar të burgosurve media e njohur britanike “The Sun”.
“The Sun” shkruan se bandat me gangsterë nga Ballkani perëndimor kanë marrë nën kontroll tregun e kokainës në Britani dhe ata që kryesojnë janë shqiptarët.
Ata theksojnë se kohët e fundit ata ua kanë kaluar edhe polakëve, të cilët më herët kryesonin në burgjet britanike.
Sipas të dhënave që bën publike “The Sun”, Ministria e Drejtësisë ka deklaruar se shqiptarët përfaqësojnë 876 nga 9,089 të burgosur të huaj në Angli.
Numri i tyre është dyfishuar përgjatë katër viteve të fundit. Në qershor të vitit 2015 numëroheshin 475 të burgosur, ndërkohë që një dekadë më parë, shifra ishte vetëm 166.
Pas vetë britanikëve dhe shqiptarëve, burgjet angleze dominohen nga shtetas me kombësi polake, rumune, irlandeze dhe xhamajkiane dhe të gjithë së bashku formojnë një kontingjent prej 83 mijë të burgosurish.
